Sinugdan sa nobenaryo sa Birhen sa Regla karon
CEBU, Philippines – Usa ka fluvial procession ang himuon karong alas 7 sa buntag sa pagtimaan sa unang novena mass sa kapistahan sa Birhen sa Regla sa dakbayan sa Lapu-Lapu karong Nobiyembre 20 ug 21. Kini ang ika-14 nga fluvial procession sa kadagatan sa siyudad.
Usa ka santos nga misa sa alas 5:30 karong buntag ang himuon sa Marigondon Parish Church sa dili pa magsugod ang prosesyon.
Usa ka motorcade sa imahen sa birhen paingon sa Pacific Cebu Resort sa Suba-basbas nga abagan sa Lapu-Lapu City Police Office ug City Traffic Management Systems.
Gikan sa resort, isakay og yate ang imahen subay gikan sa Suba-basbas, Marigondon, Agus, Maribago, Mactan, Punta Engaño padulong sa kinatumyan sa Mangal Point ug moagi sa Ibo, Pusok, Pajo ug modunggo sa Muelle Osmeña sa barangay Poblacion.
Gikan sa Muelle Osmeña, usa ka prosesyon ang himuon diin ang mga magdala sa andas mao sila si Mayor Paz Radaza ug ang mga konsehal sa siyudad padulong sa simbahan sa Birhen sa Regla. – /GMR) (BANAT NEWS)
- Latest
