Balibad ni Binay makaduda

CEBU, Philippines – Si kanhi kongresista Tomas R. Osmeña nagtuo nga mosamot nga magduda ang katawhan nga tinuod ang mga pasangil batok ni Vice President Jejomar Binay karon nga gibalibaran niya ang hagit nga magdebate sila si Senador Antonio Trillanes.

Gitakda unta sa Kapisanan ng mga Brodkaster ng Pilipinas (KBP) karong Nobiyembre 27 ang debate nila ni Binay ug Trillanes aron mapabati sa tibuok nasud ang tagsa-tagsa nila ka argumento kabahin sa mga isyu nga naglambigit sa bise presidente. Daghang katawhan dinhi sa Sugbo ang nasagmuyo nga dili na mahinayon ang debate karon nga gibalibaran na ni Binay nga sila magdebate ug ang senador.

Ang katarungan ni Binay ngano nga dili siya makigdebate ni Trillanes mao nga nailado siya nga hanas kaayo sa debate ug usa pa gayud siya ka abogado. Matud ni Binay nga ang katawhan hayan nga moingon nga gidaug-daog niya si Trillanes kay sigurado man g’yud nga lupig kini kun sila magdebate. Si Mayor Michael Rama miingon nga tukma lang ang gihimo ni Binay tungod kay dili sila “level” si Trillanes og posisyon pagka karon. Nagtuo si Rama nga gamiton lang ni Trillanes ang debate sa pagguba sa pagkatawo ni Binay.

Gipasabot ni Rama nga si Binay magpapili sa pagka presidente samtang dili kini maoy puwesto sa kagamhanan nga daganan ni Trillanes. Wala motuo si Rama nga ang katawhan magtuo nga nakahimo g’yud og kurapsyon si Binay tungod sa iyang pagbalibad sa debate.

Si Rama dumadapig ni Binay tungod kay misandig siya sa United Nationalist Alliance (UNA) diha nga nagpapili siya pagka mayor, samtang si Tommy suod nga higala ni DILG Secretary Mar Roxas nga posible’ng maoy ikasangka ni Binay sa pagka presidente karong 2016. (BANAT NEWS)