Polis gireklamo sa kauban gidakop sa NBI
CEBU, Philippines – Gidakop sa mga sakop sa National Bureau of Investigation ang usa ka police sa kasong estafa pinasikad sa warrant of arrest nga giisyu ni Judge Wilfredo Navarro niadtong Martes.
Si Supervising agent Rey Villordon uban nilang agents Jose Ermie Monsanto ug Florante Gaoiran, midakop ni Police Officer 3 Joseph Villaester diha sa opisina niini sa Criminal Investigation and Detection Group (CIDG)-7.
Gidala si Villaester sa korte ug mibutang og piyansa nga P40,000 alang sa iyang temporaryong kagawasan.
Ang kaso gipasaka kaniya ni Senior Police Officer 2 Arnold Bocayog nga kanhi nadestino usab sa CIDG-7 ug nadestino na karon sa Camp Sergio Osmeña.
Matud ni Bocayog nga niadtong Septiyembre 2013, miduol kaniya ang akusado ug gihaylo siyang mo-invest og P300,000 sa negosyo sa iyang ig-agaw nga nagpautang og puhonan sa casino, tungod niini nangutang si Bocayog og puhonan apan P100,000 lang ang iyang nahatag ngadto sa akusado.
“Nahatag na nako ang kwarta. Pasalig niya nga ang P100,000 mokita og P18,000 a month,” matud pa niya kinsa misalig siya ni Villaester kay kauban sila sa CIDG sud na sa pito ka tuig.
Apan duna siyay nahibaw-an nga dunay lain mga polis nga nabiktima ni Villaester mao nga buot unta niyang bawion ang kwarta apan wala na kini nauli.
Iya na lang nahibaw-an nga ni absent without official leave si Villaester hinungdan nga mipasaka siya og kaso. Niadtong miaging buwan lang mibalik sa trabaho si Villaester. – /EIM) (BANAT NEWS)
- Latest
