Level 2 drug pusher patay sa shootout
CEBU, Philippines - Usa ka gipasanginlang level 2 drug pusher sa lungsod sa Malabuyoc nga giingong nanganti nga mosukol sa gustong modakop kaniya ang napatay sa kapolisan diha sa iyang balay sa Barangay Sto. Niño sa maong lungsod.
Ang napusilan patay mao Edward Quiñanola, 40, duna’y ka live-in partner ug nagpuyo sa maong lugar. Ang hiniusang pwersa sa Regional Special Operations Group (RSOG-7) ug ang kapulisan sa Malabuyoc Police Station mironda sa panimalay ni Quiñanola, pinasikad sa search warrant nga gi-isyu ni RTC Judge Leopoldo Cañete sa Branch 60 sa lungsod sa Barili sa kaso sa paghupot og armas.
Matud pa ni Superintendent Rex Derilo, ang hepe sa RSOG-7 nga taud-taod nang gi-surveillance si Quiñanola tungod sa ilegal nga drugas ug giingong pagkabagis niini sa maong lugar.
Sigun pa ni Derilo nga nakadawat sila og report nga mibahad si Quiñanola nga andam kining mosukol kung dunay moronda sa ilang balay.
“Pati mga law enforcement unit are being harass by this guy, parang siga-siga ba, nagreklamo na pud ang community sa iyang involvement sa illegal drugs,” matud pa ni Derilo.
Matud pang Derilo, sa ilang pag-abot sa gipuy-an ni Quiñanola nakabantay kini dayon ug kalit nga namusil kanila, tungod niini mibawos pagpusil ang mga polis ug naigo kini sa dughan.
Dali pa unta kini nga gidala sa tambalanan apan nakabsan gayod sa kinabuhi. Nakuha sa raiding team ang shabu nga mitimbang og napulo ka gramos nga mikantidad og P118,000.
Duna sa’y mga nakuha nga mga armas sama sa duha ka .45 pistols, duha ka .38 revolver, usa ka .357 revolver ug mga bala.
Nasikop sab sa kapulisan ang upat palang ka bulang kapuyo ni Quiñanola nga si Nancy Del Castillo, 36, nga taga Tejero, Cebu City nga nakuhaan og drugas. Ang dinakpan miangkon nga tiggamitan og drugas ug nakahibalo na sab diay kini sa ilegal nga kalihokan ni Quiñanola.
Matud pa ni Derilo nga magsilbi unta nga leksiyon sa mosunod pa nilang mga target nga kriminal ang nahitabo nga mas maayong dili na lang mosukol aron dili sila mapatay. (BANAT NEWS)
- Latest
