Manulis unta nadakpan sa hepe

CEBU, Philippines - Ang hepe sa Carbon Police Station personal g’yud nga midakop sa usa ka tawo nga nagdala og wala’y lisensya nga armas didto sa Carbon Public Market kagahapon.

Ang nadakpan giila nga si Julius Flores Cataluna, 30, lumolupyo sa Barangay Buaya, dakbayan sa Lapu-Lapu. Wala’y suwerte si Cataluna kay si Chief Inspector Noel Lomente mao gayud ang nakadakop kaniya.

Matud ni Lomente nga si Cataluna misuway og bira sa bag sa usa ka babaye’ng pasahero sa PUJ apan diha nga nakabantay sa presensya sa kapolisan, dali kining midagan.

Si Lomente miingon nga nabuhian ni Cataluna ang dala niini nga Super .38 pistol nga adunay bala human siya malamba.

Nangatarungan si Cataluna nga nagdala siya’g pistola isip proteksyon sa pagbalik niya sa Carbon aron unta mopalit og selpon kay aduna siya'y nakabikil nga konduktor sa jeep sa miagi’ng semana.

Pagka karon gitanggong si Cataluna sa Carbon Police Station ug hayan nga karong Lunes pasakaan siya og kaso nga pagdala og armas nga wala’y lisensya.

Sa laing bahin, tulo ka rifle grenade ang nakit-an sa duha ka carwash boys samtang nangita sila’g kinhason sa Pilipog Creek sa lungsod sa Cordova kaniadto’ng Huwebes sa hapon.  Ang nakakita sa mga rifle grenades mao sila si Christopher Alfar, 18, taga Barangay Ibabao, Cordova ug si Jonathan Palmones, 16, nga nagpuyo sa Barangay Pilipog.

Si Palmones ug Alfar aksidente nga nakatamak og gahi nga butang sa sapa ug sa ilang pagsusi nahingangha sila pagkakita nga mga gagmay kini nga bomba.

Ang rifle grenade ibutang sa sumbohan sa mga riple sama sa M16 Armalite rifle ug ini’g buto sa armas, mobuto usab ang rifle grenade ug mopaingon sa dapit kun diin kini gitumong, dayon mobuto pag-usab kun asa kini motugpa.  (BANAT NEWS)