Pagpatuman sa mga proyekto gipaspasan

CEBU, Philippines - Padayon pa karong gitrabaho sa Department of Engineering and Public Works (DEPW) sa dakbayan sa Sugbo ang mga proyekto nga wala mahuman gikan pa kaniadto’ng 2011.

Matud ni City Engineer Jose Marie Poblete nga adunay P600 milyones nga kantidad sa mga infrastructure projects nga wala pa mahuman pagpatuman sa DEPW kaniadto ug maoy gipadayon niya pagtrabaho.

Gibutyag ni Poblete nga daghang proyekto nga kantidad og P400 milyones nasubasta na ug ang P200 milyones na lang ang nahabilin nga mao na usab ang isubasta sa City Hall karong buwana. Apil sa mga proyekto nga wala dayon mapatuman ug kabahin sa P200 milyones naglambigit sa mga drainage projects sa lainlaing barangay.

Sigon pa ni Poblete nga ang tumong sa iyang opisina nga makontrata na ang tanang backlog projects aron atubangon na nila ang mga bag-ong projects nga pundohan na sa Annual Budget 2015.

Malaumon si Poblete nga mahurot na og subasta ang mga proyekto sa dili pa matapos karong tuiga. (BANAT NEWS)