Libreng lungon ipanghatag

CEBU, Philippines – Mga kabus nga taga Toledo nga mamatyan og kabanay tabangan sa siyudad pinaagi sa ihatag nga libreng lungon sumala pa ni Toledo City Councilor Zosimo Abellanosa.

Matud pa ni Abellanosa nga ang kagamhanan maoy nipalit sa mga materyales aron sa paghimo sa lungon. Nasayran nga adunay 500 ka mga plywood ug kahoy ang gipalit alang sa maong katuyuan. Kadtong nagkinahanglan niini, mahimo lang moduol kang Barangay Talavera  Kapitan Nestor Mahinog nga maoy gipiyalan sa maong proyekto.

Matud usab ni Mahinog nga sa 500 ka plywood target niini nga makahimo og 400 ka mga lungon, gani 30 na  ka tawo ang ilang nahatagan og tabang gikan sa Barangay  Media Once, Cambang-ug, Sangi ug Malubog.

Kinahanglan usab nga mismo ang tagtungod ang moduol ug magdala og death certificate aron sa pagpamatuod.

Ang maong proyekto gipondohan sa kagamhanan sa dakbayan sa Toledo apan wala gibutyag kun asa gikuha ang pundo niini. – /EIM) (BANAT NEWS)