Langyaw nagmaoy sa imnanan
CEBU, Philippines – Napriso og duha ka adlaw ang usa ka Papua New Guinean human kini nagmaoy sa usa ka imnanan sa Osmeña Boulevard, Sta. Cruz, dakbayan sa Sugbo sayo sa buntag sa niaging adlaw. Ang gisikop sa Fuente Police naila nga si Jay Tirang, 21, ulitawo ug temporaryong nagpuyo sa Bright Tech Computer College sa maong lugar.
Matud ni PO3 Niere Cahimat nga mitawag og tabang sa kapolisan ang cashier sa imnanan nga si Alma Jumawan human gipangbuak sa langyaw ang mga botelya sa ilimnon ug nangaguba sab ang mga bangko.
Sumala pa ni Cahimat nga sagad kini buhaton sa magpabadlong nga mga langyaw kay ila ra sab bayran ang danyos sa ilang nahimo aron wala na’y kaso nga ilang atubangon.
“Bayran raman gud nila dayon ang mga na-damage unya wala na’y kaso mao ning magsalig,”sigun pa ni Cahimat.
Karong adlawa gikatakdang pasakaan og kasong drunkenness ug malicious mischief si Tirang nga karon gipaslak na sa Fuente Police Station. – /GMR) (BANAT NEWS)
- Latest
