Naghugaw-hugaw sa sam-ang gidakop
CEBU, Philippines – Daghang mga nagpataka og labay og basura diha sa mga sementeryo ang nadakpan ug naisyuhan og citation tickets sa Cebu City Environmental Sanitation Enforcement Team (CESET) sa miaging Sabado.
Wa pay labot ang mga nadakpan kagahapon hangtud kagabii sa Adlaw sa mga Minatay, apan miabot na og 378 ka tawo ang naisyohan og tiket.
Matud ni CESET head Grace Luardo mas daghan ang ilang na-isyuhan karon kompara sa miaging tuig. Sigon pa ni Luardo nga mas daghan ang naisyuhan og citation tickets sa Carreta Cemetery nga dunay 196, samtang sa Calamba Cemetery dunay 73, Barrio Luz Cemetery dunay 62, Pardo Cemetery dunay 18, Talamban Cemetery dunay duha, ug duha ‘sab sa Labangon Cemetery.
Sila nakalapas sa Republic Act 9003 kon Ecological Solid Waste Management Act. Giawhag ni Luardo ang mga nadakpan nga i-settle dayon sa iyang opisina ang ilang multa nga P500 kun di sila gustong mapasakaan sila og kaso ngadto sa korte ug malutsan og warrant of arrest.
Dunay 500 ka CESET enforcers ug Barangay Environmental Officers sa siyudad nga nagbantay batok sa magpataka og labay og basura, dili mo-segregate niini, ug magpataka og pangihi. – /EIM) (BANAT NEWS)
- Latest
