‘Tulisan’ napatay

CEBU, Philippines - Patay ang usa ka ex-convict nga 19- anyos human kini giingong misulay og sukol sa mga sakop sa City Intelligence Branch (CIB) sa Cebu City Police Office.

Ang CIB miresponde tungod sa alarma nga dunay armadong tawo diha sa M.J. Cuenco Ave. ug Ayala Access Road, Mabolo ning dakbayan ug nasugatan  ang suspek nga si Reymark Ybañez.

Si Ybañez nga residente sa maong dapit magsaulog unta sa iyang adlaw nga natawhan ugmang adlawa, Nobiyembre 2.

Matud pa ni Inspector Gomersendo Mandawe ang deputy chief sa CIB nga nahinabi sa Banat News   nga nagpatrolya ang mga sakop sa CIB sa maong lugar dihang usa ka impormante ang miduol kanila ug mipahibalo nga dunay armado nga lalaki sa maong dapit.

Apan sa dihang giduol kini sa mga sakop sa CIB ug nagpaila nga pulis dali kini nga midagan paingon sa sudlonon ug ngitngit nga bahin sa lugar mao nga ilaha kining gigukod.

Matud pa nga diha sa gisudlan sa suspek, nakabantay ang mga polis nga dunay pitik sa trigger sa armas nga ilang nadungog ug diha nila nabantayan nga gipunayan na sila pagpusil sa suspek apan mikagar ang armas niini.

Wa magduhaduha ang mga polis pagbalos pagpusil kang Ybañez ug maayong pagkaigo   niini sa dughan ,ulo ug sa bukton hinungdan sa iyang kamatayon.

“Paltik siguro ‘tong armas niya kay wala man nakabuto, maayo na lang wala nakabuto kay kung nahitabo pa murag naa g’yuy maigo sa sakop nato,” sigun pa ni Mandawe. Nakuha sa kapulisan sa crime scene ang usa ka .38 revolver nga duna’y unom ka bala diin ang tulo  niini dunay igo sa ‘hammer’ sa armas apan wala nakabuto.

Sumala pa sa CIB base sa ilang record sa suspek,  naapil kini sa watchlist sa mga notadong  tulisan sa mga jeepneys sa maong lugar, gani bag-ohay pa lang kini nakagawas sa prisohan gumikan sa kasong robbery. (Jojo C. Ugdol/EIM)(BANAT NEWS)