Rest house gilungkab
CEBU, Philippines - Dul-an sa P50 mil nga kantidad sa kabtangan ang nahanaw sa usa ka rest house sa Sagay, dakbayan sa Toledo.
Ang rest house gipanag-iya sa usa ka Rogelio Ortega Diaz, 56, usa ka engineer nga nagpuyo sa Tabunok, dakbayan sa Talisay.
Base sa imbestigasyon sa kapolisan nga gisaka ang maong rest house agi sa ikaduhang andana gamit ang kahoy nga hagdan ug giguba ang unom ka blades sa jealousy diin agi pasulod.
Nakuha ang electric cut off machine, padlock, computer set, DVD player, gitara, sunglass, bag nga adunay fashion accessories, sinena ug uban pa.
Sa follow-up operation sa kapolisan narekober ang electric cut off machine ug padlock nga giprenda sa usa ka pawnshop sa Pardo, dakbayan sa Sugbo.
Padayon pa’ng gipangita sa kapolisan ang mga suspek sa nahitabong pagpangawat.
Samtang pahimangno ni Supt. Ricky Delilis, hepe sa kapolisan sa Toledo, sa mga mobiya sa ilang panimalay sa pagseguro nga locked ang pultahan ug bintana o kaha magbilin og sakop sa pamilya o pagtugon sa silingan aron malikay sa mga kawat o lungkab nga posibleng mosiaw panahon sa pagsaulog sa kalag-kalag. (BANAT NEWS)
- Latest
