“Kahadlok Mo, Pinaskohan Ko”
CEBU, Philippines - Gibuksan na ang horror booth sulod sa Mandaue City Sports and Cultural Complex sa Sitio Tribunal, Barangay Centro, Dakbayan sa Mandaue.
Si Father Ben Ejares nga maoy parish priest sa Santa Ana Parish sa Lungsod sa Barili maoy mihimo sa pagbendita sa sulod sa tulo ka mga lawak nga pahigayonan sa maong kalingawan.
Matud pa ni Ejares nga kinahanglan ang bendisyon aron sa paglikay nga walay dautang espiritu nga mosalmot sa pagsulod niini.
Si Mayor Jonas Cortes, Bise Mayor Glenn Bercede ug uban pang mga sakop sa konseho sa dakbayan ang lakip sa mitambong sa pagbukas sa maong kalingawan nga gipasiugdahan.
Ang chairperson sa Mandaue City Council for the Protection of Children (MCCPC) nga si Sarah Cortes namahayag nga matagbaw ang tawo sa P20 nga tiket.
Subli niyang gipahibalo nga ang mahipos nga salapi maoy ilang gamiton sa pagpalit og pinaskohan sa 650 ka mga kabus nga mga bata gikan sa 27 ka barangay sa dakbayan.
Ang maong kalingawan may tema nga “Kahadlok Mo, Pinaskohan Ko.”
Gikatakda sa Disyembre 22 karong tuiga ang Christmas Party sa kabus nga kabataan sa dakbayan nga diin ipanghatag usab ang mga pinaskuhan sa mga bata. (BANAT NEWS)
- Latest
