Mga bukog ipahabwa

CEBU, Philippines – Giawhag ni Talisay City Mayor Johnny De los Reyes ang tagtungod sa mga gipanglubong sa publikong menteryo nga ipahabwa na ang mga bukog sa mga minatay nga nilapas na sa lima ka tuig.

Matud ni De los Reyes nga kinahanglan sa dili pa matapos ang tuig kinahanglan nga kuhaon na sa mga tagtungod kay kung dili usahon kini pagsulod kauban sa ubang mga bukog sa usa ka kumon nga bone chambers.

Bisan sa tinguha sa ubang tagtungod nga moabang pagbalik sa lubnganan apan si De los Reyes miingon nga ipahabwa gihapon aron mahatagan og higayun ang bag-ong mogamit sa lubnganan.

Hinuon iyang gipasalig nga may bone chambers nga ipamutang alang sa mga bukog nga gihabwa.

Samtang nangandam na ang dakbayan sa Talisay sa pagsaulog sa adlaw sa mga patay.

Matud ni Konsehal Danny Caballero, pangulo sa committee on peace and order sa konseho, nga ilang pahugtan ang pagdili sa pagdala sa mga ginadili sulod sa sementeryo sama sa mahait nga butang, sound systems ug mga ilimnong makahubog.

Gidili usab ang pagsulod nga hubog sa mga menteryo aron malikayan ang kagubot. Gipangusgan ni Caballero nga wala’y exempted sa maong lagda.

Gimandoan na usab ang mga tanod, traffic enforcers ug uban pa’ng peace keeping force nga motabang sa pagpatuman sa kalinaw ug kahapsay sa mga sam-ang. – /GMR) (BANAT NEWS)