Tipdas misaka pag-ayo pito na ang patay

CEBU, Philippines - Ang Regional Epidemiology and Surveillance Unit (RESU) sa Department of Health (DOH)-7 nipahibawo nga 1,319 porsiyento ang pagsaka sa gidaghanon sa kaso sa tipdas dinhi sa Central Visayas niining tuiga.

Ang buhatan ni Renan Cimafranca, pangulo sa RESU 7, mibutyag nga gikan sa bulan sa Enero hangtud sa Oktubre 18 ning tuiga, miabot na og 1,575 ka kaso sa tipdas ang narehistro sa iyang opisina.

Sa mao nga gidaghanon, pito na ang patay. Mas daghan kini kun itandi sa 111 lang ka kaso sa miaging tuig ug walay patay nga natala sa susama nga bulan.

Ang labing bata nga nataptan sa sakit nga tipdas ning tuiga nagpangedaron og 13 ka adlaw nga bata ug ang labing edaran kanila nag-edad og 80 anyos.

Nag-una gihapon ang siyudad sa Sugbo sa labing daghan nga kaso sa tipdas ning tuiga nga may 544 ka kaso ug usa ang patay. Gisundan kini sa siyudad sa Lapu-Lapu nga may 192 ka kaso.

Ikatulo ang siyudad sa Mandaue nga may 99 ka kaso; Talisay nga may 77 ka kaso ug usa ang patay; Balamban may 69 ka kaso; Asturias may 42 ka kaso; Dumaguete City may 35 ka kaso; Liloan nga may 28 ka kaso; La Libertad may 26 ug Toledo City nga may 23 ka kaso.

Gawas sa siyudad sa Sugbo ug Talisay, may tag-usa usab nga namatay sa sakit sa tipdas didto sa siyudad sa Naga, lungsod sa Argao, Sibonga, San Fernando ug San Francisco.

Ang DOH nanawagan sa mga ginikanan nga moduol sa mga health centers sa mga barangay ug pabakonahan ang ilang mga bata. (BANAT NEWS)