Gi-salvage ug gisulod sa malita

CEBU, Philippines - Tawo nga gi-salvage ug gisulod sa malita gilabay sa kimba ug napalgan kagahapon sa udto didto sa Sitio Visayan, Barangay Lanas, dakbayan sa Naga.

Nagkadugta na ang maong lawas ug gituohan nga usa kini ka lalaki ug nga gilabay lang ang patay’ng lawas didto sa mao nga dapit.

Si Barangay Kapitan Rey Arnosa nagkanayon nga ang ilang street sweepers maoy nipahibalo kanila kabahin sa isog kaayo nga baho sa maong lugar.

Tungod niini si Arnosa ug mga tanod misuhid sa sapa aron sa pagsubay kun asa g’yud gikan ang maong baho hangtud nga nakakita sila’g usa ka malita.

Giablihan nila ang malita ug nakugang sila kay tawo ang sulod ug pwerteng pagkabahoa kay nagsugod na sa pagkadugta ang lawas mao nga mipahibalo dayon sila sa kapolisan.

Matud sa kapitan nga posible lalake ang biktima kay mubo man og buhok nga walay gisul-ob nga sapot.

Ang mga street sweepers mibutyag nga mga usa ka semana na nila’ng napanimahoan ang lang-og kaayo’ng baho pero wala lang sila magtagad sa pagtuo nga dunay iro nga patay nga gilabay sa sapa.

Apan kagahapon sa udto dili na g’yud masingo pa ang grabe’ng kabaho hinungdan nga ang mga street sweepers mitaho ni Kapitan Arnosa.

Intak pa ang buko-buko sa biktima pero ang nawong niini dili na maklaro kay nalata na kini samtang putol ang wala nga tiil ug posible nga  tungod kini sa pagkadugta na. (BANAT NEWS)