Nanulong, gitabanga’g tigbas

CEBU, Philippines - Patay ang usa ka 36-anyos nga lalaki nga ubos sa ilimnon nga makahubog sa dihang nanulong apan gitabangan og tigbas sa magsuon diha sa Sitio Tagaytay, Barangay Napo, dakbayan sa Carcar.

Ang biktima naila nga si Randy Reyes, duna’y ka live-in partner ug nagpuyo sa maong lugar.  Samtang ang mga suspetsado naila nga sila si Christopher, 31, ug Erwin Dayagdal, 41.

Sa imbestigasyon sa kapulisan sa Carcar nga gipangulohan ni Police Officer 3 Edmund Obiso, giingong nagkuyog ang biktima ug ang iyang kapuyo pagpauli.

Matud pa nga hubog kini niadtong tungora ug kalit nga misud sa hunahuna niini nga sulongon ang kaaway nga si Christopher.

Dihang nag-abot ang duha  gikomprontase sa biktima si Christopher  tungod sa giingong pagbahad niini nga siya patyon. Sa kalagot ni Christopher misud kini sa balay ug paggawas nagdala na kini og sundang.

Daling miibot og kalibre 38 paltik si Reyes ug gipusil si Christopher apan mikagar ang armas. Diha-diha miibot sa iyang kaugalingong sundang ang biktima ug nahitabo ang tinigbasay sa duha.

Ang igsoon ni Christopher nga si Erwin pagkakita sa hitabo daling mitabang sa iyang igsoon hinungdan nga nalupig si Reyes ug diha na kini gitabangan og tigbas.

Daling gidala sa Carcar District Hospital si Reyes apan patay na kini samtang si Christopher nalandig gihapon sa maong tambalanan tungod sa kadaghan sa samad tinigbasan sa lawas niini.

Ang iyang igsuon nga si Erwin gitanggong na karon sa Carcar Police detention cell nga gikatakdang pasakaan og kasong homicide.  (BANAT NEWS)