Tulo nadakpan sa buy-bust
CEBU, Philippines - Nasakmit sa kapolisan ang mga pinaketeng shabu gikan sa tulo ka tawo nga ilang nadakpan sa buy- bust operation sa Purok Mahogany, Sitio Simboryo, Barangay Tayud, Lungsod sa Liloan.
Ang nadakpan mao sila si Michael Pepito Quirong alyas Titi, 48, Sunray Patindol, 30 ug Johnrey Garbo Ygot, 23 nga pulos nagpuyo sa nahisgotang dapit.
Si Police Officer 1 Eden Pepito sa Liloan Police Station miingon nga dugay nang gipanid-an ang suspek.
Nasakmit gikan sa tulo ang 18 ka gagmay nga paketeng shabu, usa ka medium size ug usa ka dakong putos ug P200 nga marked money ug drug paraphernalia.
Dugang pa ni PO1 Pepito nga nasakmit usab nila ang gamay nga plastic container nga gisudlan og mga tin foil ug ang usa ka itom nga motorsiklo nga giluwanan sa mga suspetsado.
Diha sa motorsiklo nakuha ang ubang drugas gawas pa sa gitunol sa suspek. (BANAT NEWS)
- Latest
