P400M alang sa rehabilitasyon sa DPWH

CEBU, Philippines -Nipagawas ang Department of Public Works and Highways og P400 milyones alang sa nagpadayon nga rehabilitasyon sa kadalanan ug taytayan nga nagusbat sa mga kalamidad.

Ang Public Information Officer sa DPWH-7, Marie Nillama, miingon  ang maong pondo alang sa tibuok probinsiya sa Sugbo.

Duna na’y mga proyekto nga nahuman ang DPWH-7 nga naglangkub sa Sogod-Tabuelan national road, Antonio Y. de Pio Highway sa San Remigio ug ang bahin sa Cebu-Hagnaya Wharf Road sa siyudad sa Bogo.

Gitutukan gyud og maayo sa ahensiya kadtong mga lugar nga grabeng naapektohan sa kalamidad sama sa lungsod sa Daanbantayan ug Tabuelan nga gikuso-kuso sa bagyong Yolanda.

Wala hinuon gibutyag ni Nillama kun kanus-a gyud mahuman ang mga proyekto nga padayon pa nga gihimo karon.

Hinoon gipaneguro sa DPWH-7 nga ang mga proyekto nga ilang gihimo karon lig-on na ug dili dayun matay-og kun dunay mga katalagman sama sa bagyo ug linog.

Hangyo sa ahensiya sa publiko nga kun mahimo tas-an ang ilang pasensiya tungod kay ang mga proyekto nga ilang gihimo makamugna gyud og kahuot sa dagan sa trapiko. (Decemay P. Padilla/GMR)(BANAT NEWS)