P83M shabu

CEBU, Philippines - Mokabat na sa kapin 83 milyones ka pesos ang kantidad sa drugas nga nasakmit sa kapulisan lukop rehiyon gikan sa bulan sa Enero hangtod sa bulan sa Septiyembre ning tuiga.

Kini ang gibutyag ni Senior Superintendent Conrad Capa ang deputy chief sa Police Regional Office-7  hinungdan nga ang rehiyon maoy nahimong numero uno lukop nasud nga dunay dakong kantidad sa drugas nga nasakmit ning tuiga.

Sa mga bulan sa Hunyo hangtod Septiyembre maoy dunay daghang nasakmit nga drugas ang kapulisan.

Si Capa mipasabot nga sa maong mga bulan nga gisugdan sa PRO-7 ang subsob nga kampanya batok sa ilegal nga drugas ubos sa kamanduan ni Chief Superintendent Prudencio Tom Bañas. Sa kinatibuk-an nagkantidad na sa P83, 175, 683.65 ang mga drugas nga nasakmit sa kapulisan. Ang shabu nga nasakmit mitimbang na og 6, 691.33 gramos samtang sa marijuana moabot na ‘sab sa 52, 513.39 gramos.

Kini nasakmit sa 1, 830 ka mga operasyon nga gihimo sa kapulisan lukop rehiyon nga miresulta usab sa pagkaaresto sa 2,376 ka mga tawo ug 2,511 kanila apil na kadtong nakaeskapo sa napasakaan og kaso.

Samtang gikan sa bulan sa Hulyo hangtod Oktubre nakahimo og 744 ka mga operasyon ang kapulisan apan dunay 22 ka mga namatay sa mga tigpayuhot og drugas ug lima kanila ang naangol.

Apan sa habig sa kapulisan, usa ang namatay ug  unom ang nasamdan atol sa anti-illegal drugs operations.

Ang probinsya sa Bohol mao’y duna’y pinakadaghan nga namatay sa ilang operasyon diin 12 ang namatay sa mga tigpayuhot og drugas, tulo ang angol, samtang usa ang patay sa habig sa kapulisan ug lima ang angol.

Way plano ang kapolisan nga momenor sa ilang kampanya batok sa ilegal nga drugas. Giklaro hinuon ni Capa nga bisan sa maong datos wala kini magpasabot dunay daghang drugas sa rehiyon. Sa laing bahin, duha ka mga gidudahang tigpayuhot og ilegal nga drugas ang nasikop sa kapulisan sa dakbayan sa Sugbo sa managlahing operasyon nga miresulta sa pagkasakmit  sa balor  P170 mil nga drugas.

Gisikop sa Pari-an Police Station ang usa ka Christopher Colagbang,  diha sa Sikatuna Street, Day-as pinasikad sa search warrant nga giisyu ni RTC Judge Fiel Navarro sa Branch 19 sa kaso sa drugas.

Nakuha sa kapulisan gikan sa dinakpan ang 15 ka gagmay nga pakete sa drugas, 22 ka tin foil ug cash kantidad P1,080. Giingong dugay nang tigpamaligya og shabu ang maong suspek.

Samtang napakyas ang Fuente Police pagsikop sa notadong tigpayuhot og ilegal nga drugas diha sa Sitio Lower Pailob, Sambag II, ning dakbayan.

Armado sa search warrant ang kapulisan nga gi-isyu ni RTC Judge Soliver Peras batok kang Jaime Dela Peña apan nakaikyas kini agi sa bintana ug milatay sa atop sa kilid sa balay.

Nasayran nga daghan og pultahan ug dunay mga alarm gadgets sama sa buzzers ang balay hinungdan nga dali rang mabantayan kun dunay mga polis.

Apan nakakuha gihapon ang kapulisan og pito ka bulto nga gidudahang shabu nga nagkantidad og P165, 200. Gisikop sa kapulisan ang igsuon ni Dela Peña nga si Dante ug ang 17- anyos nga anak niini.(Jojo C. Ugdol/EIM)(BANAT NEWS)