19 sikop sa drug raid
CEBU, Philippines - Onse ka tawo nadakpan sa gihimong anti-illegal drugs operation sa mga sakop sa National Bureau of Investigation-7 sa dakbayan sa Talisay ug Cebu City kagahapon.
Matud ni Regional Director Max Salvador, ang operasyon gipangulohan ni Atty. Edgardo Baldemos mironda sa Tangke, Talisay City batok kang Michael Padillo.
Gawas kang Padillo, siyam ka tawo ang nadakpan, usa niini giingong 17-anyos nga lalaki kinsa naaktohan diha sa drug den.
Matud ni Salvador nakuha sa maong operasyon ang 243 sachets nga gidudahang shabu, laing gagmay nga pakete sa shabu, .38 magnum revolver ug drug paraphernalia.
Matud ni Salvador, ipaubos og drug testing ang nga dinakpan, kadtong mapositibo sa drug test ilang pasakaan og kaso.
Samtang, si Roberto “Gringo” Escopete, 27, nga taga Sitio Mahayahay, Calamba, Cebu City ang nadakpan sa NBI pinasikad sa search warrant kagahapon sa alas-10 sa buntag.
Ang grupo ni Rey Villordon mironda sa lugar pinasikad sa search warrant nga giisyu ni RTC Judge Wilfredo Navarro batok sa managsilingang sila si Escopete ug Niño Ramas kinsa nakaikyas apan nakakuha sila og duha ka armas sa balay niini.
Si Escopete mihimakak sa pasangil ug gipasanginlan niya ang NBI nga “planted” ang nakuhang shabu gikan kaniya. Nakuha gikan ni Escopete gibanabana nga singko gramos nga nagkantidad og P10,000 ngadto sa P17,000.
Sa laing operasyon, ang mga sakop sa Lapu-Lapu City Police Office nakadakop og walo ka mga gipasanginlang nalambigit sa illegal drug trade sa siyudad sa upat ka barangay.
Ang mga dinakpan giila nga sila si Anton Tapao, 26, Mark Anthony Gonzales, 31, Jonathan Tampus,43,Ramilito Amodia, Rolly Origenes, Bernie Batusin , Vicente Malinao, 45, Rico Cuizon, 38.
Ang gironda nga mga barangay mao ang Maribago, Basak, Babag, ug Ibo. Gawas sa mga pinaketeng drugas nakuha usab ang usa ka .357 paltik revolver. (BANAT NEWS)
- Latest
