Transport group uyon pletehan minusan

CEBU, Philippines – Uyon ang transport group sa Sugbo sa tinguha nga paubsan ang minimum nga pletehan sa mga public utility jeepneys (PUJ). Apan ang bise presidente sa Visayas sa National Confederation of Transportworkers Alliance (NCTA) nga si Romeo Armamento miingon nga kinahanglan nga may moduso og petisyon sa buhatan sa Land Transportation Franchising and Regulatory Board sama sa ilang pagpangayo og usbaw sa pletehan.

Matud ni Armamento nga ang petisyon sa mga sumasakay nga ipasaka ngadto sa LTFRB mao usab ang basehan sa pagpatawag og public hearing nga tambongan sa mga drayber ug ubang sektor lakip na sa negosyante sa produktong petrolyo.

Atol sa public hearing, matud ni Armamento nga ilang pangayoon nga wala’y usbaw sa presyo sa produktong petrolyo sulod sa tulo ka bulan nga makalabay.

Kini aron pagseguro nga wala’y pagsaka sa presyo sa higayun nga minusan ang pletehan.

Samtang gisupak sa transport group sa Sugbo ang kausaban sa vehicle emission ordinance sa dakbayan nga magpahamtang og mas daku nga multa.

Si Konsehal Gerardo Carillo ang niduso sa multa gikan sa P3,000 ngadto na sa P5,000. Sa pagkakaron, multa nga P1,000 sa unang kalapasan; P3,000 sa ikaduhang kalapasan; ug P5,000 sa ikatulong kalapasan. Si Greg Perez sa PISTON mikwestiyon kung naghitak na ba ang mga sakyanan nga mobuga og itom nga aso hinungdan sa pag-usab sa ordinansa.

Ang lider sa PISTON mipasangil nga ang mga gagmay’ng drayber ug operator maoy kanunay’ng gigukod sa lokal nga balaud apan dunay mga sakyanan sa lokal nga kagamhanan ang mobuga usab og itom nga aso.

Si Perez miawhag nga unta unahon og atiman sa lokal nga kagamhanan ang mga sakyanan niining mobuga og itom nga aso kung tumong sa siyudad ang paglimpiyo sa kalikupan ug sa hangin nga atong gihanggap.

Dugang sa grupo nga dugang bug-at sa ilang habig ang pagpasaka sa mga multa.

Matud ni Atty. Rafael Yap, executive director sa City Traffic Operation Management (CITOM), nga ang maong ordinansa sa siyudad nauyon sa nasudnong balaud.

Dugang ni Yap nga lakip ang mga pribadong sakyanan ipaubos usab nila og emission testing kung gikinahanglan. – /GMR) (BANAT NEWS)