Kalag mibalik kay mobayad sa utang

CEBU, Philippines – Gisugilon kining maong hitabo ni Eduardo “Eddie” Suson, 47 anyos, minyo nga usa ka taxi drayber ug lumad nga taga Barangay Mabuli, lungsod sa Tabogon sa amihanang bahin sa lalawigan sa Sugbo.

Nahitabo kini kaniadto sa ilang dapit sa gamay pa siyang bata dihang naapil ilang silingan nga babaye sa naaksidente nga bus gikan sa dakbayan sa Sugbo.

Matud pa ni Suson nga adunay gitikad nga gamay nga umahan ang iyang ginikanan nga ang tanom mga tabako ug ang naaksidente nilang silingan maoy tigpalitan niini aron itumod sa Carbon Market sa Dakbayan sa Sugbo. Dugang pa ni Eddie nga maayong komprador ang mao nilang silingan kay dili g’yud niya utangon.

Apan dihay higayon nga nakuwangan og P20 ang gibayad sa ilang silingan apan misaad kini nga sa pagbalik na lang niini gikan sa iyang pagbiyahe sa Carbon iyang ihatag ang kuwang.

Diha na nahitabo ang aksidente ug nakalas kini human sa usa ka semanang  na-confine sa tambalanan.

Diha gihaya sa balay niini ang ilang silingan kay diha lang kini ilubong sa ilang lungsod.

Apan samtang nagdagan pa ang pangadye sa namatay dunay nanggawas nga mga tabi-tabi sa mga nanabat ug nagbilar nga pirmeng makakita sa maong minatay diha sa ilang palibot.

Giingong nagpakita kini nga maglingkod sa pantaw sa ilang panimalay ug usahay magpungko sa tugkaran.

Dugang pa niya, dihay usa nila ka silingang lalaki ang nakabaton og kaisog sa pagduol sa gituohan nilang kalag sa silingan dihang mipakita na usab kini sa tugkaran sa ilang panimalay.

Matud pa nga gipangutana kini  sa maong silingan kun nganong magsige man kini og pakita nilang mga silingan. Giingong mitubag ang maong kalag nga pasultihan ang iyang bana ug mga anak nga pabayran ang utang niini sa tabako.

Human misaad ang silingan nilang lalaki nga iyaha kadtong buhaton, wala na mobalik pagpakita ang kalag nini. – /EIM) (BANAT NEWS)