CPPO mo-imbestigar sa pagpatay ni PO2 Parages
CEBU, Philippines – Motabang ang Provincial Investigation and Detection Management Branch sa Cebu Provincial Police Office sa Minglanilla Police sa imbestigasyon sa kaso sa pagpusil patay kang PO2 Omar Parages, niadtong Domingo sa hapon.
Si Senior Supt. Rodolfo Albotra, hepe sa PIDMB, miiingon nga ilang tan-awon ug subayon ang motibo sa krimen apan karon pa lang duda na sila nga personal o may kalabutan sa trabaho ang hinungdan sa pagpatay.
Sumala pa sa opisyal nga duna na sila’y lead apan dili pa niya mabutyag ang detalye aron dili sab matandog ang imbestigasyon.
Usa sa giuna karon sa kapolisan ang pagpangita sa mga posibleng testigos ug ang pamahayag sa pamilya ug mga nagpuyo sa nahitaboan.
Gipasabot ni Albotra nga wala sila’y nakita ug nasubay nga dili maayong record ni Parages ug gihulagway nga usa kini ka buotan nga polis.
Nimando na si Albotra sa Minglanilla Police nga papasahon kini og incident report may labot sa hitabo ilabina sa unang migawas nga report nga ang biktma didto sa tigbakay.
Gipahinumduman ni Albotra ang mga polis sa lalawigan sa Sugbo nga dili gyud moapil sa bisan unsa nga sugal ilabina kun kini usa ka ilegal.
“Ang tigbakay ilegal man gyud na, bawal gyud na, i-discourage gyud nato to go to these places even sa mga legal nga cockfighting arena,” matud ni Albotra. – /GMR) (BANAT NEWS)
- Latest
