Babaye gitusak sa bala
CEBU, Philippines – Usa ka 33-anyos nga babaye ang natusaktusak sa bala ug namatay human kini pusila sa wala pa mailhing gunman pasado alas-5 sa hapon sulod sa usa ka balay sa Sitio Yellowbell, Barangay Kalunasan, Cebu City.
Ang biktima naila nga si Leah Abella, lumad nga taga Butuan City nga nakaangkon og daghang samad pinusilan sa iyang lawas nga dali pa unta nga gidala sa Vicente Sotto Memorial Medical Center (VSMMC) apan nakabsan gayud kini sa kinabuhi.
Matud pa ni Senior Police Officer 1 Ruth Violango sa Homicide Section sa Cebu City Police Office nga nahinabi sa Banat News kini mitug-an nga ang biktima diha sa sulod sa balay ni Roy “Negro” Dayono, 33, sa dihang ang wala mailhing gunman mikalit lang og sulod dayon pusil sa biktima. Sa pagkabantay ni Dayono nga duna’y buto buto sa armas, dali mibalik sa iyang balay ug iyang nakita nga nagbuy-od na sa salog ug nagkadugo apan buhi pa.
Samtang nagpaabot og ambulansiya makadaghan nga mihangyo kaniya si Abella nga atimanon ang iyang duha pa ka tuig nga anak nga lalaki.
“Sige siya’g ingon kang Dayono, ayaw pasagdai akong anak,” sigun pa ni Violango.
Sumala pa ni Violango wala masuhito si Dayono sa pagkatawo ni Abella kay magbisitahan lang kini sa iyang balay.
Dunay nakuhang birth certificate sa biktima nga nagpakita nga didto kini natawo sa Butuan City ug duna say Barangay Clearance niini gikan sa Barangay Maño, San Remigio. Ang mga imbestigador naglibog pa sa pagkatawo sa biktima ilabi na nga nakakuha sila og daghang SIM cards sulod sa usa ka steel case nga iya sa biktima. – /EIM) (BANAT NEWS)
- Latest
