Angay’ng “Boy Scout” kanunay

CEBU, Philippines - Opisyal sa Cebu City Disaster Risk Reduction Management Office (CCDRRMO) miawhag sa katawhan nga mangandam g’yud kanunay batok sa mga katalagman ug dili kay magsalig kanunay sa kagamhanan.

Si Alvin Santillana, CCDRRMO operations chief, nagkanayon nga kun peligro na ang sitwasyon sama sa pagtubo sa tubig angay’ng mohiklin na daan ang mga tawo ug dili kay maghuwat sa awhag sa mga opisyal.

Matud ni Santillana nga daghan kaayo sila og mga atimanon nga problema ug dili sila makapasalig nga mahatagan dayon og pagtagad ang tanang panginahanglan kun may katalagman.

Pasabot ni Santillana nga dul-an sa usa ka milyon ang populasyon sa dakbayan sa Sugbo ug sa maong gidaghanon dili tanan ang maabtan dayon og tabang hinungdan nga ang matag pamilya angay’ng andam kanunay sama sa pagbaton og pagkaon nga ilang makonsumo sulod sa duha ka adlaw hangtod nga maabtan sila og hinabang sa gobiyerno.

Tambag ni Santillana nga kinahanglang duna g’yud kini andam nga kaugalingong “disaster preparedness kit” sama sa tambal, habol, lutoanan ug labing maayo kun aduna sila’y collapsible tent aron may mapasilongan ang pamilya sa dapit nga temporaryo nila’ng balhinan.

Si Santillana midugang nga kun dunay moigo nga kusog kaayo’ng linog may posibilidad dunay mahugno nga estraktura ug hinungdan nga dili makaagi ang sakyanan ug sa maong sitwasyon maglisud usab sa pag-abot ngadto sa usa ka lugar nga apektado ang mga hinabang. - /RUB (BANAT NEWS)