3 patay sa raid

CEBU, Philippines - Tulo ka tawo ang patay lakip na ang usa ka pugante sa nahitabong engkwentro atol sa pagpangronda nga gihimo sa dul-an usa ka gatos ka polis sa onse ka balay kagahapon sa kaadlawon sa mga lungsod sa Dalaguete ug sa Alcoy.

Ang maong operasyon gihimo pinasikad sa search warrant gikan sa sala ni RTC Executive Judge Soliver Peras sa dakbayan sa Sugbo tungod sa paghupot og mga armas ug ilegal nga drugas.

Lider sa grupo

Ang napatay sa kapolisan naila nga si Jojo Gañolon, ang gitudlo nga lider sa gun for hires ug robbery group nga nag-operate sa bukirang bahin sa Alcoy, Boljoon ug Dalaguete. Napatay ‘sab sila si Jaylhone Mercado, nga taga Sitio Lutawan, Barangay Nalhub sa Dalaguete ug si Lorenzo Coronel, nga taga Nug-as, Alcoy.

Ang mga nasikop mao sila si Erwin Amandoron, 41, bana sa kapitan sa Barangay Nalhub; Vicente Asenjo, 36; Randy Belda, 32; taga Nalhub, Dalaguete;  Lucino Quivido, 58;  Michael Manriquez, 45, Barangay Kagawad; Hermigildo Capal, 65; Esteban Salonoy, 60, nga taga Jolomaynon, Dalaguete.

Samtang si Mario Coronel, 49; Timoteo Amaca, 35, Barangay Kagawad; ug si  Alvin Coronel, 20; pulos mga taga-Barangay Nug-as sa lungsod sa Alcoy. Apan nakaeskapo ang laing mga suspek nga sila si Jonathan Moran; John Michael Mejares; William Salonoy; ug si Arnel Bacatan.

Daghang mireklamo

Ang regional director sa Police Regional Office 7 nga si Chief Superintendent  Prudencio Tom Bañas miingon nga daghan nang mga reklamo nga nadawat ang kapolisan bahin sa ilegal nga kalihokan sa maong grupo diha sa maong dapit.

Narekober sa kapolisan ang duha ka KG9 submachine pistols, lima ka kalibre .45 nga pistola, pito ka kalibre .38 nga revolver, duha ka .380 revolver, duha ka fragmentation grenade, mga magazines ug bala.

Narekober ‘sab ang usa ka bundle nga pinauga nga marijuana, pipila ka pakete nga shabu nga wala pa mahibaw-i ang kantidad atol ning pagsuwat sa balita ug P15 mil nga gituohang halin sa ilegal nga drugas.

Matud pa ni Bañas nga nanghasi sa mga molupyo sa tulo ka barangay ang maong mga suspek nga gipangulohan ni Jojo Gañolon kinsa nakaeskapo human nadakpan sa kaso sa ilegal nga drugas niadtong 2012.

Nagtukod og grupo

Sumala pa ni Senior Police Officer 1 Reynaldo Solante, nga usa sa midakop kang Gañolon kaniadto, nagtukod og grupo sa kabukiran si Gañolon human kini nakaeskapo.

Samtang si Senior Superintendent Noel Gillamac ang director sa Cebu Provincial Police Office mihulagway ni Gañolon nga usa ka gun-for-hire.

Matud pa niya, dihang nakatukod og grupo si Gañolon nagsugod na sila og pagpanghulga sa mga tawo ug nangilkil sa mga negosyante ug kadtong dili makahatag ilang patyon.

Midugang si Gillamac nga niabot na ang reklamo batok sa grupo diha sa buhatan ni Gob. Hilario Davide III. Sumala pa niya, gigamit usab ang grupo sa politika, sumala pa niini sa report sa DyLA. Pipila ka semana na ang nakalabay dihang dunay duha ka mangomprahay og hayop ang gipamatay atol sa tabo sa Nug-as, Alcoy. Gidudahan nga ang maong grupo maoy responsable niini.

Way planong motahan

Matud pa sa hepe sa Provincial Intelligence Branch, Supt. Rodolfo Albotra  nga si Gañolon pag-umangkon sa kapitan sa barangay Nalhub. Gihulagway sa kapolisan nga wa g’yuy intensyon si Gañolon nga motahan tungod kay nabasa nila sa cellphone niini nga nakadawat kini og text nga nagpadulong na ang polis sa iyang balay.

Matud pa nga gipagawas niining daan ang iyang asawa ug mga pag-umangkon ug nangandam sa pag-abot sa mga polis apan nakorner siya ug napatay dihang iyang gipamusil ang mga polis.

Wa mosukol

Apan ang kaipon ni Gañolon nga Mabeth Dibdib, 26, miingon nga wala siyay kasayuran sa illegal nga binuhatan sa iyang kaipon tungod kay panguma maoy gisaligan nila Gañolon aron ikabuhi kanila sa iyang anak.

Dako na lang ang ilang kakurat nga gironda sila sa kapulisan nga miresulta sa kamatayon niini. Giangkon hinuon niya nga pugante ang iyang kaipon apan wala niya kini hatagi og bili tungod sa kahadlok nga basin og lainon og sabot ni Gañolon.

Samtang ang inahan ni Gañolon nga si Rosalina miangkon nga dunay armas ang iyang anak apan atol sa operasyon giingong wala kini nisukol apan gipusil sa mga polis.

Ang mga armas ipaubos sa ballistics examination aron tan-awon kun nagamit ba kini sa uban pang mga krimen.

Masaligon si Gillamac nga sa pagkasikop sa maong mga tawo ug sa kamatayon sa tulo napiangan na ang maong grupo. - /EIM (BANAT NEWS)