Mga polis gipaabot sa nagtulis sa bangko
CEBU, Philippines - Usa ka gituohang tulisan nga nakonsensiya sa iyang gibuhat pagtulis sa usa ka bangko sa Estados Unidos wa modagan ug gihulat hinuon ang polis aron magpadakop.
Si Richard Gorton, 64, matud pa nga misulod sa Banner Bank sa Bellingham, Washington dayong tunol sa teller og usa ka papel nga nagdemanda nga ihatag ang kwarta ngadto kaniya.
Matud pa nga way nahimo ang teller gawas sa paghatag sa kwarta ug dali’ng migawas ang suspek sa bangko.
Apan inay nga molayas nag-etambay hinuon ang maong suspek duol sa bangko diin nakit-an kini sa mga polis nga miresponde.
Sumala pa nga miangkon ang maong suspek nga iyang gitulis ang bangko apan nagbasol siya sa iyang gibuhat maong iyaha na lang gihuwat ang mga polis aron magpadakop.
Ang maong suspek natanggong na karon sa Whatcom County Jail ug naghuwat pa ang kapolisan sa arraignment sa iyang kaso. Apan nagdumili pagbutyag ang kapolisan sa kantidad sa iyang natulis. (BANAT NEWS)
- Latest
