Mga polis gitultolan sa kalag

CEBU, Philippines - “May kalag gayud ang tawo,” kini maoy bukas pamahayag nga giluwatan ni Police Officer 3 Raymond Sabang Pepito, imbestigador sa Daanbantayan Police Station nga nahinabi sa Banat News.

Namatud-an niya kini dihang nag-imbestigar siya sa kaso sa 12-anyos nga batang si John David Diano sa Sitio Pasil, Logon, Malapascua, Daanbantayan nga na-missing sud na sa tulo ka adlaw.

Matud pang Pepito, sa walo ka tuig na niyang pagka-imbestigador mao pa kadto ang unang higayon nga ang mismong biktima nga namatay na, mitabang aron siya matultolan kun asa siya gipatay.

Ang bata gipa-blotter sa inahan kay na-missing sukad pa Agosto 24, 2014 kay wa na mauli. Matud pa ni Pepito, daghang mitumaw nga nagkalainlaing pagtuo kabahin sa pagkahanaw niini, dunay miingon nga milayas kay nangluod kay gikasab-an, adunay miingon nga gitagoan sa “dili ingon nato” ug duna say miingon nga gitagoan kini sa naibog nga mga bayot sa ilang dapit.

Ambongan kaayo ang maong bata mao nga wa isalikway ni Pepito ang posibilidad nga gisignit kini sa bayot nga giingong kanunay manghagad nga tupihan kini og libre ug librehon sa pagpanglaag,apan pirmeng balibaran sa bata. Magsugod na unta og imbestigar si Pepito sa maong bayot apan kalit nga naukay ang Barangay Logon niadtong Agosto 27 kay mibutho ang bata.

Matud pa nga nakig-estorya pa kini sa suod nga higalang batang babaye nga miingon kaniya nga gipangita na siya sa ilang maestra ug inahan niini apan giingong nagbakho kini sa pagtubag og: “Gusto lagi unta kong mopauli sa akong Mama  pero, dili nako makapauli!”

Ang batang babaye nga daw gibati og kahadlok nananghid kang John David sa paghuwat lang sa maong dapit ug sa pagbalik niini, kauban na ang ubang mga bata ug silingan. Dihay misuway kaniya og gunit aron di makadagan apan wala silay nakuptan ug midagan ang bata palayo. Apan midagan si John David padung sa kalibonan.

Gipangita sa migukod nga bata si John David hangtod nga ilang nakita ang patay’ng lawas niini sa maong dapit nga nagsugod na pagkadugta.

Sa eksklusibong report sa Banat News niadtong Agosto 28,  si PO2 Macarthur Monsanto, tourist police nga nadestino sa maong lugar ang apil sa migukod sa bata. Siya miingon   nga midagan paingon sa kasagbutan ang bata ug didto nakatimaho sila og langsa kaayo nga  baho. Sa ilang pagsubay, ilang nakita ang patay’ng lawas sa usa ka bata nga gibinaklid ug may gipaslak nga panapton sa baba.

Nasayran usab ni Pepito nga ang silingan nga amang nga nagpuyo usab sa maong dapit daan nang nagsige og hasi sa mga silingan niana pa lang Domingo nga nagsige og senyas dungan sa pagbundak sa iyang tiil nga daw duna kini gustong ipasabot. Apan kay lagi amang, wala siya paminawa sa mga silingan. Hangtud nga nabaniog na sa barangay ang pagkawala ni John David ug daghan na ang nagtinabangay sa pagpangita, samtang wala nila hatagi og panahon ang amang.

Si PO3 Pepito miingon nga dihang napalgan na ang patay’ng lawas diha na nahibaw-an nga tinuyo ang pagpatay kaniya.

Sa kataposan, gipaminaw na sa mga tawo ang amang  kinsa mitabang sa pagkonektar sa mga impormasyon kay siya usa sa mga gibukbok sa killer nga usa ka drayber sa habalhabal. Iyaha unta kining gisanta sa iyang gibuhat kang John David apan gikulata siya og apil  nianang adlaw nga Domingo.

Ang suspek mao si Alberto Ravillas Hermosa, 28, ang kapuyo sa igsuon ni John David.  Matud pang Pepito, nailhan si Alberto dihang gipatawag ang tanang drayber sa habal-habal ug gipatan-aw sa amang.

Hangtud nga kataposang gipatawag si Alberto nga mao na lay habal-habal drayber nga wa makita sa amang. Dihadiha positibo siyang gitumbok sa amang.

Nasayran nga nasuko ang suspek sa bata kay wala kini motuman sa iyang sugo nga bantayan ang iyang anak. Makadaghan higayon na usab diay gikulata sa suspek ang bata apan walay nakaako pagbadlong kaniya. (BANAT NEWS)