Duha ka babaye biktima sa budol

CEBU, Philippines - Nabiktima sa budol-budol ang duha ka babaye sa dakbayan sa Lapu-Lapu.

Usa ka Antonetta Pestaño, taga Poblacion sa dakbayan ang nabiktima sa modus sa tulo ka wala mailhing babaye sa merkado sa barangay Gun-ob.

Matud sa biktima nga samtang siya naglakaw sa merkado, adunay tulo ka babaye ang niduol ug nangutana kung mopalit ba siya og fire extinguisher ug kung mopalit aduna siya’y madawat nga kwarta.

Human sa pipila ka oras nila nga sabot-sabot, gihatag ni Pestaño ang tulo niya ka mahalong gamit nga naglakip sa iyang relo, kwentas ug usa ka gold nga singsing.

Ang tulo ka babaye mihatag sa gamay nga hand bag nga kuno kwarta ug daling nilakaw ug sa dihang gi-ablihan ni Pestaño ang maong bag, pulos papel ang sulod niini.

Gibana-bana nga moabot sa P15 mil ang tulo ka butang sa biktima nga nadala sa mga babaye kinsa nahanaw sa palibot.

Samtang usa ka Maria Lourdes Paneria, 35-anyos, taga barangay Babag, ang nailad usab sa samang modus sulod sa Gaisano Island Mall sa barangay Pajo.

Matud ni PO1 Adonis Carba nga ang biktima nakigkita sa suspek  nga si Michael Dagdin, 34-anyos nga taga sitio Lahing-lahing, Mabolo, Cebu City.

Si Dagdin giingong nibaligya sa duha ka cellphone nga gisulod og puwa nga pouch kang Paneria sa kantidad nga P2 mil.

Human sa pagbaylo sa kwarta, nakurat na lang si Paneria nga duha ka sabong panglaba ang sulod sa gamay’ng pouch.

Daling nitawag og polis ang biktima ug nagpatabang nga mabawi ang kwarta.

Nabawi sa kapolisan ang kwarta ug gidakop ang suspek. (BANAT NEWS)