Bata patay, 4 angol sa 2 ka aksidente

CEBU, Philippines – Patay ang usa ka tuig pa lang nga bata samtang nalandig sa tambalanan ang iyang inahan ug amahan human nabanggaan og motorsiklo sa barangay Colon, dakbayan sa Naga, niadtong Lunes sa kadlawon. Ang namatay naila nga si Christopher Homeres samtang angol ang mga ginikanan nga sila si Tyron Homeres, 24 ug Cristina Egano, 18, pulos nagpuyo sa maong lugar. Ang motorsiklo nga gimaneho ni Rey Lagudas Ag-ag, 27, taga sitio Mahayahay, Apas, dakbayan sa Sugbo ug may backrider nga si Jerome Carampatan, 29, nga taga Dumanjug, ang nakabangga sa mga biktima. Lakip sa  naangol si Carampatan ug daling gidala sa South General Hospital kauban sa mga biktima.

Nakabsan gyud sa kinabuhi ang bata samtang nagpirmahay og kasabutan ang duha ka habig nga ang pamilya sa drayber ang moabaga sa tanang gastohanan ug dili na mopasaka og kaso ang pamilya sa namatyan.

Samtang grabeng naangol usab ang usa ka babaye nga nadasmagan sa naghaguros nga motorsiklo sa dalan S. Jayme, Paknaan, dakbayan sa Mandaue alas 3 pasado ang takna sa hapon niadtong Lunes.

Ang biktima mao si Tesie Dignos Masong, 40-anyos, taga Zone Kamunggay sa maong lugar ug ang motorsiklo nga nakadasmag gimaneho ni Mario Pepito Briones, Jr., 26-anyos, nagpuyo gihapon sa maong dapit.

Ang biktima daling gidala sa tambalanan samtang ang drayber sa motorsiklo ang temporaryong gitanggong sa kapolisan ug kasong reckless imprudence resulting to serious physical injuries ang giandam usab nga kasong ipasaka batok niini.   – /GMR) (BANAT NEWS)