3 big time pushers nakaipsot

CEBU, Philippines – Duha ka tawo ang nasikop ug pipila ka armas ang nasakmit lakip na ang kapin sa P270 mil nga kantidad sa shabu atol sa operasyon sa Regional Special Operations Group 7. Ang RSOG-7 miimplementar sa tulo ka search warrant  pasado alas 8:00 sa miaging buntag sa Barangay Sta Cruz, San Francisco, Camotes Island batok nila ni Noli Sostino, Edmund Formentera ug Michael Sostino nga gihulagway ni Capa nga mga big time drug pusher sa Camotes. Apan tungod sa pagbabag nila ni Regan Rica ug Jenifer Sostino nakaikyas ang tulo ug nakigpinusilay pa sa mga polis sa ilang pag-eskapo. Si Jenifer ug Rica nakuhaan og armas ug 24 ka pakete nga shabu.

Si Senior Superintendent Conrad Capa, deputy regional director for operations sa Police Regional Office 7 miingon nga ang tulo ka search warrants giisyu ni Executive Judge Soliver Peras sa RTC Branch 10 sa dakbayan sa Sugbo.

Nakuha sa kapolisan gikan sa balay sa tulo, ang usa ka .38 revolver, tulo ka kalibre .45 nga pistola, usa ka fragmentation grenade, usa ka .357 revolver, usa ka 5.56 caliber revolver (Frontier), .22 magnum revolver ug mga bala, tulo ka celphone ug usa ka gun replica, timbangan ug nagkadaiyang pinaketeng shabu ug drug paraphernalia ug kinatibuk-ang cash nga dul-an P5 mil nga gituohang ilang halin sa shabu. – /EIM) (BANAT NEWS)