“Milugos” sa iro ‘sikop

CEBU, Philippines – Usa ka 36-anyos nga pintor ang gipapriso human kini naaktohan nga milugos sa usa ka iro diha sa Upper Cubacub, Dakbayan sa Mandaue alas- 4 pasado ang takna sa miaging kaadlawon.

Si Police Officer 1 Urbensith Felecio sa kapolisan sa Presinto 6 sa Mandaue City Police Office (MCPO) nga nahinabi sa  Banat News miingon nga ang suspek (pangalan gipugngan sa Banat News) lumad nga taga Barangay Looc, Ubay, Bohol.

Matud pa ni Felecio nga ang 53-anyos nga tag-iya sa iro maoy nakasakop sa suspek tungod sa kinagulkol sa gawas sa ilang panimalay.

Sa pagsusi niini sa gawas, maoy iyang nakit-an ang suspek nga  way purol nga nakighilawas sa iyang iro hinungdan nga iyaha kining gibadlong. Ang suspek matud pa nagdali sa pagsul-ob sa iyang purol.

Gidakop sa tag-iya ang maong suspek ug mitawag kini sa kapolisan ug gitugyan kini kanila.

Ang suspek gipaubos sa liquor test  diha sa Mandaue City Hospital ug migawas nga hubog kini dihang nahitabo ang pagpakighilawas niya sa iro. Si PO2 Giovanni Gacusan, usa sa miresponde miingon nga ang suspek   nagkamuritsing usab  atol sa pagkasakop kaniya.

“Ang iyang sanina nagkalapok-lapok, naputos pa sa asiti ug lapok kay gikupogan niya ang iro,” matud ni Gacusan.

Apan matud pa ni Gacusan nga kusganong gihimakak sa suspek nga iyang nahilabtan ang iro ug mitubag sa pag-ingon: “wa lagi ko nanghilabot sa iro, babaye akong gusto.”

Matud pa usab ni Felecio ilang gibalhog ang suspek ug pasakaan unta nila og kaso nga ubos sa kalapasan sa Animal Welfare Law ug kalapasan sa City Ordinance Number 434 kun paghuboghubog.

Apan kagahapon sa buntag mipatim-aw ang tag-iya sa iro sa ilang buhatan ug mipahibalo nga dili na siya mopasaka og kaso sa suspek.

Tungod usab sa kaluoy,  ang mao gihapong tag-iya sa iro mao pay mibayad sa multa nga P500 tungod sa paghubog-hubog sa suspek hinungdan nga kini nakagawas sa prisohan. – /EIM) (BANAT NEWS)