Dugang P70M sa dredging giduso

CEBU, Philippines - Giduso sa konseho sa dakbayan sa Sugbo ang dugang P70 milyones nga gahin sa dredging project alang sa kasulbaran sa problema sa baha sa siyudad.

Sila si Konsehal Noel Wenceslao, Roberto Cabarubias, Gerardo Carillo, Hanz Abella ug David Tumulak ang miduso og resolusyon alang sa dredging sa kasapaan ug ubang agianan sa tubig.

Ang lakang sa nahisgutang mga opisyal may kalambigitan sa plano sa pag-restore sa kanhi gilapdon sa sapa diha sa Lahug, Guadalupe, Bulacao, Kinalumsan ug Mahiga.

Ang konseho gikatakdang maghisgut karong adlawa sa allocations sa maong proyekto.

Ang City Disaster Risk Reduction and Management Council, City Planning and Development Office ug Department of Engineering and Public Works patambungon sa maong tigum sa konseho.

Subay niini, si City Budget Officer Marietta Gumia mi-certify nga dunay budget alang sa maong proyekto karong tuiga ubos sa DEPW.

Ang P70 milyones gitunga alang sa habagatan ug amihanang bahin sa dakbayan sumala sa program of works and estimates nga giandam sa DEPW. (BANAT NEWS)