Multicab vs Minibus

CEBU, Philippines - Naangol ang napulo ka tawo human mabangga ang ilang gisakyan nga multicab ngadto sa usa ka mini bus pasado alas -4 kagahapon sa hapon sa Barangay Poblacion sa dakbayan sa Naga.

Si Police Officer 3 Ken Cabrera, desk officer, nga nahinabi sa Banat News miingon nga ang multicab gimaneho ni Jerry Quilaton, samtang ang mini bus gimaneho sab ni Edgar Lapis, 33, taga Perelos sa dakbayan sa Carcar.  

Nasuta sa imbestigasyon nga ang multicab gikan sa Barangay Casay sa lungsod sa Dalaguete aron unta mag-advance birthday party sa mga pari sa parokya sa maong lungsod.

Miingon si Cabrera nga mikawat sa pikas lane ang multicab hinungdan nga nadumog kini sa dulong sa mini bus hinungdan sa pagkaangol sa driver ug sa mga sakay sa multicab.

Angol sila si Charlotte Mirafuentes, 16; Rejie Lou Tambuli, 16; Russel Anova, 16, Persillana Juagpao, hingkod, nga taga Casay, Dalaguete.

Angol sab si Catherine Quilaton, 18;  Aurora Tesorio, 56;  Owen Tesorio, 18, Niodas Quilaton, 56, nga taga Kawayan, Dalaguete.

Laing naangol mao sila si Emily Caballero, 46, taga Mantalongon, Dalaguete ug si Gilbert Rosasina, 15, taga Tubod Barili.

Matud pa ni Cabrera nga ang tanang angol dali nga gidala sa South General Hospital human sa hitabo tungod sa kadaot nga naangkon nila sa ilang lawas.

Samtang ang drayber sa mini bus gitanggong karon sa Naga City Police Station samtang giandam pa ang kaso nga ipasaka batok kaniya. (BANAT NEWS)