Transport federation mugnaon

CEBU, Philippines – Gitinguha karon sa nagkadaiyang transport group sa Sugbo nga maghugpong sila aron hiusahon ang ilang tingog pagsupak sa gipatuman nga Joint Administrative Order 2014-01 nga nagpahamtang og dagko’ng multa ngadto sa madakpang drayber.

Si Romeo Armamento nga maoy vice president sa National Confederation of Transportworkers Union (NCTU) sa Kabisay-an miingon nga ang pagtukod og pederasyon sa transport group ilang nahukman atol sa ilang tigum niadtong Miyerkules.

Matud ni Armamento nga ang tigum gitambongan sa mga opisyal ug mga sakop sa nagkadaiyang transport  organization, apil niini ang kahugpongan sa mga multicab drayber sa amihanan ug habagatang bahin sa lalawigan, dakbayan sa Lapu-Lapu ug dakbayan sa Sugbo.

Gitataw ni Armamento nga giplano nila ang pagtukod sa Cebu Province Worker Transport Federation nga ang tumong mao ang paghiusa sa ilang mga lakang pagsupak sa pagdakop ug pag-impound sa ilang sakyanan.

Ang mga sakop sa Pinagkakaisang Samahan ng mga Tsuper at Operators Nationwide (PISTON) naghimo sa miagi’ng semana  og protest rally pagpakita sa ilang pagsupak sa gipatuman nga JAO 2014-01 nga dagko og multa sa drayber ug tag-iya sa mga sakyanang pasaheroan nga depektoso ang headlights ug uban pa’ng accessories. – /RUB) (BANAT NEWS)