Lola nga “pusher” nadakpan

CEBU, Philippines – Nasikop sa mga sakop sa Carcar Police ang usa ka 75-anyos nga lola  pinasikad sa usa ka search warrant batok kaniya tungod sa pagpamaligya og ilegal nga drugas diha sa Sitio Cambuntan, Barangay Bolinawa.

Ang nasikop mao si Beatrice Secretaria, 75, nga molupyo sa maong dapit, nakuha gikan sa iyang balay ang usa ka medium sized nga pakete, 12 ka gagmay nga pakete nga pulos dunay sud nga gituohang shabu ug drug paraphernalia.

Daling gidala sa Carcar City Police Station ang maong lola ug kasamtangang natanggong  sa maong bilanggoan samtang gipaabot pa ang kaso nga ipasaka batok kaniya.

Samtang nasikop sa kapolisan sa Liloan ang usa ka lalaki sa buy-bust operation ang usa ka Vivencio Raterta Jr., 34, nagpuyo sa Sitio Suba, Barangay Poblacion.

Napalitan siya og usa ka pakete nga shabu sa kantidad nga P200 ug dugang  lima ka gamay nga pakete niini ang nakuha sa iyang posesyon.  Sa laing operasyon, nasikop sa mga sakop sa Consolacion Police ang duha ka lalaki nga gireklamong mibahad sa usa ka lalaki sa Sitio Sun-ok, Barangay Tayud sa lungsod sa Consolacion.

Ang nasikop naila nga sila si Christian Villamor, 22 ug si Arnold Judaya, 22,  pulos molupyo sa nahisgotan nga lugar, sila gireklamo sa usa ka Randy Atico, 26,  tungod sa pagpanghulga nila kaniya.

Atol sa hot pursuit operation giingong nagmagahi ang duha ug misukol pa sa mga polis  apan nalupig ug sa pagsusi kanila, si Villamor gikatahong nakuhaan og usa ka gamay nga paketeng gituohang shabu. – /EIM) (BANAT NEWS)