Rob group nia sa rehiyon gi-monitor
CEBU, Philippines - Gi-monitor karon sa Regional Intelligence Division sa Police Regional Office-7 ang impormasyon nga usa ka grupo sa mga tulisan gikan sa Mindanao ang ania karon sa rehiyon.
Si Senior Superintendent Pablo “Paul” Labra II miklaro hinuon nga base sa nahipos nilang impormasyon wa dinhi sa Sugbo ang grupo.
Apan bisan pa man niini dili gihapon kampanti ang kapulisan sa maong impormasyon ug mipakatap og kamanduan sa lukop probinsiya nga mohimo og subsob nga surveillance.
Gitug-an niya nga makasalig ang publiko nga ilang gihimo ang tanan aron dili makaigo dinhi ang grupo.
Sa laing bahin, usa ka babayeng trabahante sa usa ka dakong mall sa Barangay Jugan, Consolacion ang gitulis kagahapon sa kaadlawon sa usa ka lalaking nagmotor.
Giila ang biktima mao si Shella Caramel Pandac, 24 , taga Negros Oriental ug kasamtangang nagpuyo sa Barangay Jugan.
Matud pa nga nag-atang ang biktima og kasakyan nga habal-habal dihang gihunongan sa usa ka nagmotor, nagtuo ang biktima nga mamasahero kini apan kalit siyang gitionan og armas ug mideklarar nga tulis.
Gikuha sa lalaki ang iyang shoulder bag nga may kuwarta, company ID, cellphone ug uban pa dayong ikyas palayo. (Jojo Ugdol ug Romeo Limpangog/EIM)(BANAT NEWS)
- Latest
