Selos ang hinungdan

CEBU, Philippines - Ang sobrang selos maoy nakitang hinungdan kun nganong napatay sa usa ka inahan ang iyang duha pa ka bulang anak nga masuso sa lungsod sa Daanbantayan sayo ning semanaha. Kini ang gitug-an ni Police Officer 2 Faith Rodrigo,  imbestigador sa Women’s and Children Protection Desk sa Daanbantayan Police nga nahinabi sa Banat News.

Base sa mga nakuha nga impormasyon sa kapulisan, dugay na nga walay maayong relasyon ang mag live-in partners kay sigehan kini og away sa suspek nga si Rosavilla Gullen. Niadtong Huwebes sa hapon napasaka na ang kasong parricide batok kang Gullen. Matud pa ni Rodrigo nga sa pagpasaka nila sa kaso dili unta gusto nga mokuyog ang bana kay dili kini gusto nga makakita sa suspek tungod sa grabeng kasuko.

Apan ila siyang gipasabot nga kinahanglan siya kay siya man ang nagsilbing reklamante. “Didto na lang namo gipasakay sa pikas nga sakyanan kay dili gyod siya gusto nga makakita sa iyang ka live-in,” dugang pamahayag ni Rodrigo.

Ang asawa nga naestorya ni Rodrigo wala gihapon direktang miangkon sa maong hitabo . “Wala na daw siya kabalo sa iyang gibuhat kay hubog daw siya ato.”(Jojo C. Ugdol/EIM)(BANAT NEWS)