10-anyos patay sa tipos

CEBU, Philippines - Namatay gyud ang 10-anyos nga batang lalaki kinsa positibo sa tipos niadtong Miyerkules sa Vicente Sotto Memorial Medical Center.

Si Cebu City Health Officer, Dr. Daisy Villa, mibutyag nga ang namatay mao si John Mark Desoacido, taga sitio Tugasan, Guadalupe.

Niadtong Domingo siyam ka residente sa sitio Tugasan ug Sandayong ang na-admit sa Cebu City Medical Center (CCMC) lakip na ang mga igsuon ni John Mark.

Niadtong Lunes, si John Mark ug ang mga igsuon gibalhin sa VSMMC.

Gawas sa siyam, laing duha ang giobserbahan sa VSMMC.

Matud ni Villa nga duna pa’y duha ka pasyente ang nahibilin sa CCMC kinsa giingong dunay dengue nga nagpanuigon og 8 ug 4-anyos samtang dunay upat  ang naa sa VSMMC.

Gibutyag ni Villa nga sa mga nahisgutang pasyente nga gikuhaan og laboratory test, si John Mark lang ang positibo sa tipos.

Giingong ang maong bata gihilantan sulod sa upat na ka semana una pa napaubos sa laboratory examination.

Ang sakit nga tipos makuha sa kontaminadong pagkaon ug tubig sa kagaw diin usa nga hinungdan niini mao ang hugaw sa tawo o mananap.

Giingong dunay mga residente sa nahisgutang barangay ang wala’y mga pansayan.

Ang tubig nga gigamit sa mga residente sa lugar gikuhaan na og sample ug gipaubos na sa eksaminasyon.

Si Villa nanawagan kini sa mga residente sa ubang kabarangayan nga kanunay’ng manglimpiyo aron malikayan ang mga sakit-sakit. (Brenda D. Batuto/GMR)(BANAT NEWS)