Masuso gipatay sa mama

CEBU, Philippines - Gipaslak sa bilanggoan sa Daanbantayan Police ang usa ka 33-anyos nga inahan   human kini gitudlo nga miunay sa pagpatay sa iyang duha pa lang ka bulan ug 19 ka adlaw  nga anak nga babaye.

Ang krimen gikatahong nahitabo niadtong Lunes sa kaadlawon diha sa ilang balay didto sa Sitio Pasil, Barangay Maya sa maong lungsod.

 Ang inahan giila nga si Rosavilla Gullen, nagpuyo sa maong lugar kinsa dunay kapuyo nga nagtrabaho isip usa ka porter. Sa impormasyon nga nakuha sa Banat News nga pag-umangkon ra sa suspek ang misumbong sa krimen human niya kini nasaksihan.

Si Police Officer 2 Faith Rodrigo, ang imbestigador sa Women’s and Children Protection Desk nga nahinabi sa Banat News mitug-an nga usa ka 15-anyos nga pag-umangkon ni Gullen maoy yawe sa pagkasikop niini.

Sumala pa ni Rodrigo nga ang bata maoy tigbantay sa masuso kun  wala ang managkapuyo.

Matud pa ni Rodrigo, ang bata mitug-an nga pasado alas-10 sa gabii niadtong Domingo hubog nga nauli sa balay ang suspek ug nangita kini sa iyang ka live-in partner.

Gisugo niini ang bata nga pangitaon ug papaulion ang iyang kapuyo ug mibahad nga iyang kitkiton o tuk-on ang ilang anak kung di kini mouli. Apan napakyas ang bata nga makit-an ang lalaki hinungdan nga mibalik kini sa iyaan.

Matud pa nasuko ang suspek ug nakit-an niya kining gikutaw ang pulbos nga sabon sa beberon sa masuso, apan wala hinuon masuta kun gipatutoy ba kini niya sa anak.

Nianang pagkaalas dos na sa kaadlawon nananghid ang bata nga mopauli na sa ila kay pangitaon na kini sa iyang inahan, apan giingong gibanghagan kini sa suspek ug giingnan nga :“og molakaw ka unsaon man nako ning bata ako ning kitkiton?”

Tungod kay giduka na, migawas g’yud ang bata apan sa iyang paglingi, iyang nakita ang iyaan nga gituok ang masuso ug gibunalbunal kini, matud pang Rodrigo. 

Sa kahadlok sa bata midagan kini sa iyang inahan ug misumbong. Dangtan pila ka gutlo, misunod ang suspek ug nangayo og tabang kay namatay na ang iyang anak.

 “Nagduda na man gud ang inahan sa 15 anyos mao to nga gipangutana ang bata,” sigun pa ni Rodrigo.

Sa resulta sa autopsy , nasuta  nga dunay lakra sa pagtuok sa liog niini ug grabe ang bun-og sa ulo niini.

Gibutyag ni Rodrigo nga grabe ang kasuko nga gibati sa amahan sa bata nga sumala pa 15 ka tuig na diay kini nga nag live-in ug mao pa kadto ang ilang una nga anak.

Apan ang inahan nga nakaestorya ni Rodrigo kusganong mihimakak sa krimen ug mipasangil nga basin giurom lang ang bata o nahulog sa higdaanan niini. 

“Gi-urom ra daw ang bata sir, pero lig-on kaayo ang ebidensiya namo against niya,” sumala pa ni Rodrigo.

Ang mga silingan nga na estorya sa kapulisan nagkanayon nga maghilak ang adlaw kung dili hubog nga mauli sa ilang balay ang suspek.  Mismo ang bana niini ang nangusog nga pasakaan g’yud og kasong parricide ang iyang kapuyo karong adlawa . (BANAT NEWS)