Husay sa kaso sa “cult leader” gisibog

CEBU, Philippines – Wa mahinayon ang unang paghusay sa kasong serious illegal detention batok ni Casiano Apduhan Jr., ang gipasanginlang lider sa usa ka kulto diha sa Balamban, kagahapon sa hapon.

Gikatakda unta nga ipresentar ang unang witness sa maong kaso apan giuswag kini tungod sa kabilinggan sa panglawas ni Judge Hermes Montero sa Regional Trial Court RTC Branch 59 Toledo City.

Nasayran nga usa ka Emma Nepomuceno ,33, ang giingong gitanggong sa panimalay ni Apduhan sa barangay Buanoy  sulod sa dul-an lima ka tuig sukad pa niadtong Nobiyembre 27, 2008  hangtod na sa Marso 26, 2014. Apan una nang namahayag si Nepomuceno sa korte nga iyang kabubut-on ang pagpuyo sa panimalay ni Apduhan.

Si Emma ang giingong giluwas sa National Bureau of Investigation (NBI)-7 dihang gironda ang panimalay ni Apduhan sa Balamban.

Giuswag sa Oktubre 21 adlaw’ng Martes ang pagpahigayon sa unang hearing sa kasong serious illegal detention ni Apduhan. Gawas sa kasong serious illegal detention gireklamo usab si Apduhan sa kasong illegal possession of firearms human nasakmitan kini og duha ka paltik .38 revolver ug giakusahan sa pagpatay sa 15- anyos nga batang lalaki nga si Angelo Repuela nga napalgang gilubong  sa tunnel ilawom sa panimalay  sa akusado.

Ang tanang mga pasangil lakip ang pagka-lider sa kulto hugot nga gihimakak ni Apduhan. -/EIM) (BANAT NEWS)