Duha naangol atol sa demolisyon sa Mahiga

CEBU, Philippines – Duha ang naangol sa gipahigayon nga demolisyon sa mga panimalay sa Mahiga Creek sa Sitio Mahayag, Barangay Subangdaku, Dakbayan sa Mandaue kagahapon sa buntag.

Ang mga naangol mao ang inahan ug anak nga sila si Elma Remedio, 51, ug Alvie Remedio, 21, nga nalakip sa gipapahawa sa nahisgotang dapit.

Si Elma nga nahinabi sa Banat News miingon nga nagbarog lang silang duha sa iyang anak duol sa ilang balay nga nagtan-aw sa nagpadung nga demolition team dihang kalit nga nanglupad ang mga bato ug nangaigo sila sa ulo.

Maayong pagkagisi sa ilang mga ulo ug daling gitabang sa mga sakop sa Accident Control and Emergency Rescue Team (ACERT) nga didto sa lugar.

Dunay 153 ka pamilya nga sakop sa Sitio Mahayag  Association Structures Homes (SMASH) nga gipangulohan ni Leopoldo Chavez nga maoy presidente ang apektado sa demolisyon, apil ang balay ni Chavez sa gidemolis.Pipila kanila benepisyaryo sa relocation site sa Paknaan.

Si Carlo Ybañez sa Mandaue City Legal Office nga maoy nangulo sa demolition team nga nahinabi sa Banat News miingon nga tanang estraktura sa kilid sa Mahiga Creek demolison.

Matud pa ni Ybañez nga napugos sa pagpasirit og tubig ang mga sakop sa Bureau of Fire Protection (BFP) human nga misulay unta pagbabag ug nanglabay og bato sa demolition team.

Si Senior Inspector Miguel Andesa, hepe sa Presinto 2 sa Mandaue City Police Office (MCPO) nga nahinabi sa Banat News miingon nga nakontrol ra usab dayon ang komosyon ug napahigayon gyud ang pagpangguba sa kabalayan. (BANAT NEWS)