5 milyones ang adik sa PHL
CEBU, Philippines – Ang pangulo sa Center for Behavioral Sciences sa Vicente Sotto Memorial Medical Center, Dr. Renato Obra namahayag nga dili mawala ang problema sa drugas kun dili seryosuhon ang kampanya batok niini.
Si Obra, maoy pangulo sa departamento diha sa VSMMC maoy nag-atiman sa mga tawong may kakulian sa pangisip ug kadtong mga tawo nga nagumon sa ilegal nga drugas ug nalisoan sa panghuna-huna.
Si Obra bag-ohay lang mitambong sa kaulohan sa usa ka panagtigom nga nagtuki sa problema sa ilegal nga drugas miingon nga dunay kapin lima ka milyones nga drug dependents ang Pilipinas karon.
Apan ang bed capacity sa mgA drug rehabilitation centers nga iya sa gobiyerno ug pribadong drug rehabilitation centers anaa lang sa singko mil.
Nagkanayon si Obra nga ang problema sa ginadiling drugas dili lang problema sa kapulisan apan problema kini sa komunidad.
Matud sa doktor nga kun dili magpakabana ang katawhan ug magsalig lang sa awtoridad nga sikopon o ba kaha tabangan ang mga nabiktima niini, dili g’yud kini mahunong.
Si Obra nasagmuyo usab sa mga balita nga dunay pipila ka mga tinugyanan sa balaod nga nalambigit sa illegal drugs.
“Very sad to say nga the protectors are sometimes the perpetrators, I’m talking about the authorities, wala nako gi-single out kung kinsa man pero Og naigo man gani mo, mangwarta lang ‘ta sa laing pamaagi ayaw lang ning ingon ani,” matud ni Obra.
-/EIM) (BANAT NEWS)
- Latest
