Convenience store sa Mandaue gitulis
CEBU, Philippines - Nawad-an og kapin sa P20 mil nga kita ang usa ka convenience store sa Tipolo, dakbayan sa Mandaue nga gitulis sa duha ka armadong lalaki nga sakay sa motorsiklo alas 2 pasado kagahapon sa kaadlawon.
Si Police Officer 1 Fredilou Quezon sa Presinto 2 sa Mandaue City Police Office (MCPO) miingon nga nagpatuo nga mga kustomer ang mga suspek nga misulod sa C-24 Foodmart nga bukas sulod sa 24 oras.
Matud ni Quezon nga nagpili-pili pa sa mga baligya ang duha ug dihang miduol sa cashier nga si Arlisa Gacasan, 31-anyos, nga taga Zone Sili, Paknaan sa maong dakbayan, kalit lang mition og armas dungan ang pagdeklarar nga tulis.
Si Gacasan nga nakalitan wala na makalihok tungod sa kahadlok ug gipanghakop sa duha ka tulisan ang kuwarta sulod sa kaha ug nagdali sa pagpanggawas.
Misakay sa gi-parking nga motorsiklo sa gawas sa nahisgutang tindahan ang duha ka tulisan ug mipabulhot pagpadagan paingon sa dakbayan sa Sugbo.
Alas 5 na kagahapon sa buntag gikataho sa buhatan sa kapolisan ang insidente.
Dugang pa ni Quezon nga naglakip sa ilang gisusi ang video footage sa close circuit television (CCTV) camera sa nahisgutang convenience store sa pamasin nga ilang mailhan ang duha ka armadong lalaki nga nagtulis niini. (BANAT NEWS)
- Latest
