Motor vs minibus usa patay
CEBU, Philippines – Patay ang usa ka drayber sa motorsiklo human kini nasaghiran sa usa ka mini bus diha sa national highway sa Barangay Sangat, lungsod sa San Fernando, Sabado sa gabii.
Ang drayber sa motorsiklo naila nga si Francis Carlos Sanchez, 27, usa ka collector nga taga Casuntingan dakbayan sa Mandaue, samtang ang drayber sa minibus naila nga si Marino Marco Calago, taga Bitoon, Dumanjug ug nagmaneho sa CHAN Minibus.
Matud pa ni Senior Police Officer Two Victor Cuyno ang desk officer sa San Fernando Police nga nahinabi sa Banat News paingon sa dakbayan sa Sugbo ang motorsiklo nga gimaneho ni Sanchez, apan pag-abot sa maong lugar nasaghiran kini sa maong minibus.
Tungod sa hitabo misarasay ang gisakyan nga motorsiklo sa biktima paingon sa kilid nga bahin sa kalsada ug nadasok sa daplin ug maayong pagkalamba sa kilid sa dalan.
Dali pa unta nga gidala sa Minglanilla District Hospital ang biktima apan nakabsan gayud kini sa iyang kinabuhi. Samtang boluntaryo ‘sab nga mitahan ang drayber sa minibus sa kapulisan.
Gitug-an ni Cuyno nga dulhogon ang maong kalsada.
Sa pagkutlo niining balita gitanggong na sa San Fernando Police ang drayber sa minibus ug wala pa’y nadawat nga impormasyon ang kapulisan kung duna bay sabot-sabot ang isi’g ka habig sa biktima ug sa drayber. -/EIM) (BANAT NEWS)
- Latest
