Mga armas ug bala nasakmit
CEBU, Philippines - Lalaki nasikop human makuhai og armas atol sa pag-implimentar sa search warrant sa miaging hapon sa Barangay Bunga sa dakbayan sa Toledo.
Ang nasikop naila nga si Paulino Pestañas alyas Kibol, molupyo sa Purok 11, sa nahisgutan nga barangay. Pasado alas-12 sa miaging tungang gabii ang mga sakop sa Cebu Provincial Public Safety Company gipangulohan ni Inspector Raymundo Enriquez Jr., mipatuman sa search warrant sa panimalay sa suspek.
Wa makabantay ang suspek nga naa ang kapolisan hinungdan nga wala na kini makaikyas.
Narekober sa kapolisan ang duha ka kalibre .45 ug usa ka kalibre .38, duha ka magazine ug 14 ka bala.
Human sa pagkompiskar sa maong mga armas daling gidala ang suspek ngadto sa outpost sa PPSC sa Toledo aron maandam nila ang kaso nga ipasaka kaniya.
Gisusi pa sa kapolisan kung ang mga armas sa suspek gigamit ba sa ubang krimen. Pasakaan og kasong kalapasan sa Comprehensive Law on Firearms and Ammunitions ang maong suspetsado ugmang adlawa. (BANAT NEWS)
- Latest
