Wanted nadakpan sa kasong pag-pangulata

CEBU, Philippines -  Nadakpan na sa kapolisan sa dakbayan sa Mandaue ang usa ka wanted human sa pagtago-tago sukad niadtong 2012.  

Si Victor Ato Badelis, hingkod ang panuigon, nisibat gikan sa sitio Back Shell, Banilad sa dakbayan sa Mandaue dihang nalutsan og warrant of arrest sa korte.

Si SPO3 Teodore Fuentes sa warrant section sa Presinto 4 sa Mandaue City Police Office maoy nakadakop kang Badelis sa Mambaling, dakbayan sa Sugbo pinasikad sa warrant of arrest nga giluwatan ni Judge Marilyn Yap.

Si Badelis una na nga nadakpan sa kapolisan sa Presinto 11 sa Cebu City Police Office (CCPO) niadtong Huwebes tungod sa kasong physical injuries.

Si SPO3 Sean Colovio sa Presinto 11 nga nahinabi sa Banat News miingon nga ang kabanay ni Badelis maoy biktima sa pagpangulata kinsa mao usab ang nagpahibawo kanila nga wanted kini sa dakbayan sa Mandaue sa kasong murder. Dugang ni Colovio nga nagsusi sila sa kapolisan sa dakbayan sa Mandaue ug nasuta nga dugay na kini nga gipangita sa kasong murder.  (BANAT NEWS)