Boarding house sa konsehal nasunog
CEBU, Philippines - Mokabat sa P150 mil ang gibiling danyos sa nasunog nga boarding house ug usa ang naangol nga nahitabo sa sitio Pilapil, Casuntingan, dakbayan sa Mandaue alas 11:30 sa buntag kagahapon.
Si SFO1 Ceferiano Codilla, imbestigador sa Bureau of Fire Protection (BFP) sa maong dakbayan, miingon nga ang kayo nagsugod sa panimalay nga gipuy-an ni Edgar Gutid, 29-anyos, kinsa didto na sa trabaho atol sa hitabo.
Ang lima ka mga boarding houses nga pulos ginama sa kahoy nga gipanag-iya ni Casuntingan konsehal John Codoy ang nasunog ug gituohang kuryente nga gikitkit sa ilaga ang hinungdan.
Matud ni Codilla nga si Lea Esconia, 20-anyos, nga nagdali sa pagpauli gikan sa gitrabahoan niini ang nakaangkon og mga paso sa iyang kamot dihang misuway pagtabang sa iyang mga butang.
Dugang pa ni Codilla nga nagsugod na unta sa pagsilaob ang kayo sa duha ka andana nga panimalay ni Codoy apan dali kining napawong sa pagpasirit nila og tubig.
Gipaubos sa second alarm ang sunog tungod kay gawas nga nahimutang sa sudlonon nga bahin ang lugar pulos pa gyud mga ginama sa light materials ang mga panimalay.
Sa pakisusi sa kabomberohan nasayran nga pulos na daan ang mga wirings ug nakit-an ang kinitkitan sa ilaga. (BANAT NEWS)
- Latest
