Na-missing nga drayber patay na

CEBU, Philippines -  Drayber sa taksi nga gi-report nga missing napalgang patay ug gitabonan sa hagonoy ug wala nay sapatos sulod sa usa ka subdivision sa barangay Pulangbato ning dakbayan sa Sugbo.

Ang namatay naila nga si Pablo Otadora, 42, molupyo sa Barangay Kalunasan sa dakbayan sa Sugbo.

Si Police Officer One Salvador Cabasa Jr., nga nahinabi sa Banat News miingon nga ang kusinero sa San Pedro Calungsod Quasi-Parish sa Pulangbato uban sa mga kolitos maoy nakakaplag sa biktima.

Dali nilang gipahibalo ang mga awtoridad ug sa pag-abot sa mga sakop sa Homicide Section, nasuta nga nag-ubo na ang biktima sa yuta ug wa nay sapatos ug nagsugod na og kadugta. Gidudahan nga dunay tawo o mga tawong mipasipala sa biktima.

Duol sa nahimutangan sa iyang patay nga lawas may kwarta nga narekober nga mokabat og kapin sa P100.

Di pa matino sa kapolisan kun unsay hinungdan sa kamatayon sa biktima hinungdan nga nagpatabang sila sa mga sakop sa PNP Regional Crime Laboratory 7 alang sa autopsy sa maong lawas.

Matud pa ni Cabasa nga dihay mga saksi nga miingon nga niadtong Miyerkules sa gabii naagian pa nila ang usa ka taxi sa maong lugar ug sa pagbalik nila didto pa gihapon ang maong taxi.

Apan ang taxi nga gimaneho sa biktima narekober na lang sa kapolisan sa Barangay Tejero sa miaging adlaw.

Gikatahong siyam pa lang ka adlaw nga nagmaneho sa maong taksi ang biktima, apan nahibulong ang asawa niini tungod kay wala na kini mouli sukad pa niadtong Miyerkules sa gabii. Gisusi pa sa kapolisan kun unsay motibo sa pagpatay sa biktima kun tulis ba o panagbangi tungod kay walay saksi nga nakakita sa maong krimen. (BANAT NEWS)