Proyekto sa kabarangayan minusan
CEBU, Philippines - Minusan ngadto sa P2 milyones gikan sa P6.6 milyones ang balor sa proyekto nga ipanghatag sa kagamhanan sa dakbayan sa Sugbo ngadto sa kabarangayan karong tuiga.
Atol sa consultation sa gisugyot nga 2015 annual budget, gibutyag ni kanhi konsehal Joey Daluz, executive assistant sa buhatan sa mayor ngadto sa mga kapitan nga dili na madawat ang P6.6 milyones.
Kini tungod kay na-expire na niadtong Disyembre human mapakyas sa paghatag og liquidation ang 70 sa 80 ka barangay sa siyudad.
Giduso sa buhatan sa mayor ang P3 milyones sa supplemental budget alang sa kabarangayan apan P2 milyones lang ang gisugyot sa konseho tungod sa kakuwang sa pondo.
Hinuon gipasalig ni Daluz nga dugangan ang hinabang sa siyudad alang sa mga proyekto sa kabarangayan.
Gahinan og P50 milyones ang kabarangayan alang sa ilang livelihood program, P40 milyones sa kalihukan sa paugnat sa kusog ug katunga sa local development fund sa siyudad nga P1.3 bilyones bahinon sa kabarangayan.
Gihulagway ang gisugyot nga 2015 annual budget sa siyudad nga barangay-based o people’s budget. (Decemay P. Padilla/GMR)(BANAT NEWS)
- Latest
